La féra ed… tótt i dè

Chi cgnàss al mánd – acsè rotánd – duvva as nascánd – tant vagabánd – mezz furibánd? – Guardam in fánd – de ste perfánd.

Quant ucaron – quant bèe teston – quant fa mincion – che-s-dan dal ton – propria dabbon, - ech san alchèr – che-s-fan stimèr – che-s-fan paghèr – perchè i san fèr – oh! che sumèr.

Ecco dû spôs – che peren mrôs – ech vivn’ascôs – in mezz a ‘l rôs – brisa gelôs, - e i sen udiôs – i-en schifôs – dû vergognôs! – Gran brótta scménza – tótta apparénza – gnint ed prudénza – manch ed decénza – gran sconveniénza – per l’innocénza.

Che ‘na putèna – là ‘na dunléna – bianca e russéna – ben giustadéna – bela, siuchéna – con tótt ed crèna – ch’la fa la bléna – oh! che zivténa – cun chi puvozz – chi bée bambozz – fat cun di tozz – tótt in un rozz – atténti ai scozz!

Quant professor – medich, dutor – sénza valor: – quant zugador – vistì da sgnor – gént sénza cor – sénza pudor – cun poch unor – baracador – stramanador – sénza creanza – sénza sustanza – pin d’ignoranza – cun dl’aroganza – in abundanza – che mèl de panza – Sgnora Custanza!

Quant buratén – grand, piculén – quant arlichén – seltamartén – quant chega-zchén – fatt a struzzén – ch’fan i pajazz – da mattr in mazz – cun Michilazz… – chi vol stel faz – sti brótt mustazz – da fer di… strazz?   

Volta bandéra – fazz da galéra – quérti in manéra – da cambièr céra – tranlerantéra – che brótta… féra – che brótta… féra!

Fulminant.

Modna, 17 znèr 1901.