A San Žemiàn
E féra, féra, féra,
chi-n-n’ha quattrén s’despéra…
L’è al tèmp ed la legéra
e dl’onestè in galéra!
L’è tótt un ciàpa ciàpa
pr’acaparèr la pàpa;
e cun pió la se stràpa,
sèmper de pió la s’aràpa.
Sintì bén cal sibiól,
ch’al sóna quall ch’al vól,
e al stóna pió ch’al pól…
Al dvintarà un brèv fiól.
Ecco ché ‘na perfeddìa
che tótt al mand l’inveddìa;
sol al marì al-l’inseddìa…
E al mróš al la sussedia!
A-gh’è là un ucarón,
tot rezz da marangón:
mo cun del pann da pavón,
al cmanda in dl’istruzión!
A-gh’è un guastamestér
ch’a-n prà mai dir ed savér
né descarrèr, né tašér…
E quall lè l’è cavalér!
Adèsa a spunta un sgnór,
ch’a-gh pieš pòch al lavór…
Préma al srà professór
e dapp comendatór!
La vdiv là in mèž cla póvva
ch’l’è chèlda c’me na stóvva?...
La diš ch’l’è ašérba l’óvva,
perchè l’a-n-gh’riva… indóvva!
Guardèe cal bešamdaji
ch’al córr adrèe al parpaji
e al-gh pòrta a cà i curaji
da insfilzer pò… Eleraji!!
Schivèe la žò cla s’ciòpa,
ch’la s’dandla e ch’la s’intòpa:
la gènt la sa chl’è zòpa,
mo vdrii c’ma la galòpa!
E avanti i muscardén,
a spass cun i scialtén…
Mo ed sfròmbla un birichén
agh ruba i mazulén!
E fénna i gucciaróo,
purtròp al dè d’incóo,
i gh’han tótt i taróo…
E i vècc i-insagn’n ai fióo!
Tóta na baladóra,
dla màsa ech rèsta fóra:
se un quelchidun lavóra,
sa’n va in peršón, ch’al móra!
E chi fa tant bacàn?...
El solit quàter ràn
ch’el sguàzzen in dal pantàn…
Eviva san Žemiàn!
Al Dòm, la Ghirlandéna,
al nòn e la nunéna,
i gh’han ‘na mascaréna,
ch’la réd sira e maténa…
E féra, féra, féra,
chi-n-n’ha quatrén s’despéra…
L’è al tèmp ed la legéra
e dl’onestè in galéra!
Nessun commento:
Posta un commento