giovedì 15 maggio 2014
Brušám la vècia
(Fòla da méža Quaréšma)
A méža quaréšma a-gh’è l’ušanza ed brušèr la vécia: l’è ónna coša ch’i
fèven i nòster nònn, e la s’è mantgnuda fénna ai nòster gioren.
Giovedè passèe in dimandi cà a s’è fâtt sta funzión a ónna vècia ed
stàppa, e la gént séria, bvánd un scudlót ed cal bón e i stéven a vádder ste
bèl divertimént, in mèž ai mróš e ai ragazzóo, cume la coša pió naturèl dal
mand.
Quand ónna vècia l’è brótta a s’sènt dir: “L’è quàlla là ch’a brušám
st’èltr’ân per méža quaréšma!”.
Anch quâsta, dónca l’è ónna specialitèe ed Modna dágna d’èsser studièda:
e fórsi dimândi di mée léttor i avran vója ed savér cum’a sia vgnu só
st’abitudin, perchè la sia vgnuda, e da còša la sia stèda uriginèda.
*
L’è ónna stòria d’amor sémpliz, curta e cummuvénta, ch’la farà zighèr
e-gli aném pietòši, cum’è vèra ch’a gh’è la Madánna.
A gh’èra ónna vècia brótta, grinzóša, bruntlóna, cativa cume ónna jena:
la gh’aviva ségh ónna sòo anvóda, un sprictén ch’tirèva i bašén luntan un mja,
ónna simpatia, ónna carázza d’ónna ragazzóla, ch’la gh’aviva i cavî biánd cum’è
l’òr, i ôcc turchén cum’è al žafìr, al còl bianch cum’è al lat, i laber ed
curaj, i dént d’avóri, ónna vitléna drétta come un fuš. A dégh, la sembrèva
ónna butéga da chincagliér.
Mè a scumátt ch’a-i-avì capì subét ch’la gh’iva al mróš.
L’è naturèl: la vècia l’affitèva el camèr, e lè avsén a lór, a gh’stèva
ónna dužéna de studént. Appéna i se vdén con la Ninóccia (i la ciamèven acsè),
i s’piašén subét e i-s mittén a fèr l’amor. A-n ve dégh èter, e a-v fàgh grazia
dal rèst, perchè sti šmrušamént i-én tótt cumpagn.
*
I fèven l’amor. Quand la Ninóccia psiva scapèr da la nòna, la curiva dal
studént ch’al fèva i cónt ed léžer al lébber di còdiz, ch’l’éra anch da tajèr…
La vècia un gióren l’a gh’arivé adòss. L’a-s mité a fèr di zigh cum’ónna
strija inspiritèda. La ciapé la Ninóccia p’r’al còl e pò la gh’tirò i cavî e la
gh’dé un chèlz in-t’i schén, la gh’mité i dî in-t’i occ e la gh’dé di pógn in-t’al
nèš. L’éra furibánda.
La vliva fichèr via al studént, mo la pensò bén che dápp l’a-n
n’avrév pió di bajòch d’la dužéna e la tulé la decišión d’atachères la Ninóccia
a la so stanèla cun ónna còrda, perchè la fóss sémper avšén a lée, e l’a-n ghe
scapéss mai.
*
Ónna sira la vècia la s’indurminté sóvra al calzátt. Al studént, ch’l’iva
fat un buš in-t’l’óss, al s’n’acuržé, l’avèrs pian pian e al véns atach a la
Ninóccia e a gh’dé una duzzèda ed bèš, chi sembrèven sajátt.
A la nòna a gh’sembré ed sénter quèl, e l’avré i ôcc e dšánd: “A sènt dal sussur!”. Al pòver ragázz al
scapé via come al lamp, mo briša tant prèst che la vècia l’a-n'al vdéssa.
Alóra la ciapò ónna gáccia e la s’mité a furèr in-t’i brázz, in-t’la
vétta, in-t’al còl cla dešgrazièda ed cla ragazzóla, che, ogni furòt, la
zighèva: “Ahi!”, cun ónna vušléna e di brivid chi avrén fat schrmìr al sanghèv
a un ešigliè d’la Sibéria.
*
Cus’a fé dápp cla vècia pitòca? Sicámm l’óss d’la camra dal dužžinant al
s’avriva per dénter, la ligò ónna gran còrda atach a la ciavadura e pò tótt al
dè la s’la tirèva drée per cà. “Acsè
– la giva – ló a-n pól avrir l’óss senza
che mè a sénta”.
E la Ninóccia la zighèva come ónn’ànma danèda, la bagnava al cussén a la
nott, e quand l’éra a dišnèr, la fèva dvintèr da bròd la mnèstra sótta.
Mo cuša pól fèr l’amor! Al studént, con al timprarén ch’al druvèva a šghèr
al banch d’la scóla, al šlargò un bušanén ch’a gh’éra in-t’l’óss, e da lè,
quand la strija la durmiva, i s’dèven di bašén chi avrén fat, Dio m’al perdóna,
dvintèr ed tótt i culòr ónna mèdra badássa.
*
El còš psivènli seguitèr acsè? No d’sicura. A-n cuntèva che tótt i
inquilén, i avšinant, el dánn dal stradèll i gèssen a la vècia: “Mo lassèi fèr
chi dû pòver ragázz! A-n vdî ch’i s’vólen bén come dû mat?”.
Mo lée, cativa in-t’l’anma, l’a-s divèrtiva a fèr sufrir la Ninóccia, la
la rughèva, la gh’pzighèva el gamb quand l’éra a lètt, e, del vòlt, quand la
s’mitiva a séder, la gh’tirèva via la scrana ed sátta perchè la caschéssa lánga
destèša.
Aviv mai vèst ónna nòna pió indiavlèda, ónn’ànma pió bàssa e scelerèda?
No d’sicura.
*
Un dè al studént, a fórìa d’andèr a la lezión a l’Universitè, a gh’vins ónna
bèla idea.
L’éra sira: l’éra al giovedè ed méža Quaréšma: in strèda a gh’éra ónna móccia ed gént ch’ridiva fort e
ch’balèva al són d’un organén dstunèe.
La strija, come al solit, la s’éra indurmintèda cun al calzátt, cun la
còrda ch’tgniva assicurè l’óss, lighè in-t’al buš d’la scrana.
I dû ragázz i stèven a suspirèr un da ‘na pèrt e un da cl’ètra d’la
pòrta, e i-éren stóff ed bašères perchè i avivèn i làber sótt.
Al studént l’éra stóff ed vivèr acsè: l’éra óra ed finirla propria da bón.
Al mátt fóra dal buš un zirén lángh e al tàca fógh a la còrda. La còrda
s’bruša e la s’ròmp pian pian; l’óss s’pol avrir. La Ninóccia la scapa de-d’là
in d’la camra dal mróš e i stan là p’r’un pzulén a studièr al còdiz.
*
Tótt in un mumént i vádden un gran lušór. I mátt’n via al lébber e i
corrén in d’la camra in-duv’éra la vècia.
Cuša váddni? La còrda s’éra brušèda fin in fánda.
Figurèv i urèl d’la strija ch’l’a s’sintiva scutèr e ch’la se vdiva la
mòrt acsè avšén!
I dû mróš i vinén in zémma a l’óss, abrazèe, e pò i-n fân un pàs
p’r’aiutèrla!
I la stân a vádder brustlìr a pòch a pòch, pèzz per pèzz, fin che la fò
dvintèda un pèzz ed carbón ed un mócc ed zándra.
Dápp i tulén un pòch d’acqua, ónna palátta e i spazzén via i avanz: i
avanz ed quálla ch’i aviva fat tant sufrir.
I ciamén só i ballarén ch’éren in strèda e pò i ballén tótta nòt, celebránd
cun di eviva e di brindiši la vècia brušèda.
Acsè l’è nèe st’ušanza ed méža Quaréšma, perchè a savì che al pòpol,
quand al s’ataca a ónna còša a-n la lassa pió andèr.
Se i mée lettor i-èn cuntént a-i’hò piašèr tant e pò tant…
(La mée fòla l’è finida – tai’t al
nèš e fat ‘na piva)
Iscriviti a:
Commenti sul post (Atom)
Nessun commento:
Posta un commento